 To feler – ein konsert
Sundag 8. november blir det konsert med felespelarane Aslak O. Brimi og Erlend Viken. Brimi og Vikenbyr på ein konsert med drivande godt samspel der feletradisjonen frå Gudbrandsdalen møter feletradisjonen frå Oppdal. Begge utøvarane er solide musikarar med ein rekkje sigrar og prisar. Cd-en deira, Duo, fekk seinast i haust ein pris under årets FolkeLarm.
Høyr smakebitar frå cd-en: www.myspace.com/feleduo
Konserten er sundag 8. november kl 19.30 på Fagerlund Hotell, Fagernes.
Pris vaksne kr 150,- / skuleungdom kr 80,-
Brimi og Viken har spelt i saman i fleire år, fyrst i meir uhøgtidelege samkome seinare meir målretta fram mot cd-utgjeving. Konserten vil i all hovudsak innehalde samspel mellom desse dyktige musikarane. Om denne samspelforma uttalar Sigrid Moldestad seg slik i ei pressemelding frå plateselskapet Talik:
Samspel med to feler er for mange spelemenn den optimale samspelforma. Det er som ein samtale. Den eine spør, den andre svarar, eggar kvarandre opp, roar seg, kranglar, trøystar og skrattar høgt saman. Møter i klangane, som ei forelsking, som ein dans ein ikkje vil skal ta slutt. Det er ein fortrulig leik som krev årvakne øyrer og nysgjerrig ope sinn. Det er respekt og tillit. Erlend Viken og Aslak O. Brimi leikar godt saman - du høyrer nesten kor dei smiler av krafta frå kvarandres feler, du kjenner kor dynamikken bølgjer frå bogedrag til bogedrag. Erlend som den leikande stemmespeleren, Aslak med personlige variantar som i møtet får ekstra kraft. Som lyttar vert du ei floge på veggen som tek del i deira private feststund. Det er samspel med avtrykk frå gamal og ny tid. Det er historier som er blåkledde, gåtefulle eller berre lugume. Det er spelemannsliv. Det er det urgamle møtet mellom menn frå to dalføre.
Då er det berre å ynskje alle vel møtt til Fagerlund, til ein konsert, to feler og to dyktige spelemenn!
|
